نهاية العالم 1

"أنا عارفة انا بعمل ايه كويس أوى"

أكتر جملة "أمنية" بتستخدمها لما تضيق بيها السبل فى أى نقاش يحصل بينها وبين أى إنسان تانى. هى عارفة إنها إنسانة كبيرة ومثقفة وواعية. ورغم سنها الصغير (أواخر العشرينات) إلا إنها دايما حاسة إن دماغها أكبر بكتير من سنها.. واللى مشجعها إن اللى حواليها بيأيدوها فى الموضوع ده.

"يا ضحى إنتى مش فاهمة.. أنا رافضة المبدأ من أساسه, يعنى ايه واحد يجيلى البيت يتفرج عليا وبعدين يفكر مع نفسه بعد كده إذا كنت هعجب الباشا ولا مش هعجبه؟؟ إيه الاسلوب السخيف ده؟؟ هو فاكرنى جارية فى سوق العبيد".

أمنية كانت تقريبا بتصرخ وهى بتكلم صاحبتها فى التليفون وبيتكلموا فى موضوع العريس.. أيوة عريس. أمنية بنت جميلة ومتعلمة وبتشتغل فى شركة كبيرة وتعتبر إنسانة مستقلة بحياتها رغم إنها عايشة مع والدها ووالدتها, أخلاقها عالية وتربيتها فاضلة وكل الناس اللى اشتغلت أو اتعاملت معاها شهدتلها بكده.. لكن طبعا (الحلو ميكملش).. أمنية لغاية دلوقتى متجوزتش...

بالنسبة لأمنية الموضوع كان عادى جدا بالعكس دى كانت مبسوطة منه.. زيها زي اى بنت ناجحة فى حياتها حاسة ان الجواز ممكن يعطلها كتير عن مسيرتها المهنية.. بس بالنسبة لأى حد تانى- وخصوصا الأهل طبعا- الموضوع ده كان يعتبر كارثة بالمعنى الحرفى للكلمة.

"أمنية" مكانش عندها فى الحياة غير أمنية واحدة بس.. (هى إن الناس تسيبها فى حالها) دى فعلا كانت أقصى أمانيها فى الحياة. دايما كانت بتستغرب ليه الناس مهتمة بيها بالشكل الغريب ده؟؟.. ليه دايما محاولات (توفيق الروس فى الحلال)؟؟ ليه دايما شايفينها العروسة المناسبة لأى واحد عايز يتجوز؟؟ "يا ناااااااااااس ارحمونى بقى سيبونى أعيش حياتى زى ما انا عايزة.. مش زى ما انتم عايزين".

 

ضحى: "يعنى انتى خلاص ناوية تعيشى حياتك كده طول عمرك.. يا ستى سيبك من الجواز.. مش عايزة ابن ولا بنت يقولولك يا مامى يا عبيطة".

أمنية: "أولا انا ولادى هيبقوا متربين ومش هيقولوا كده.. ثانيا عايزة وكل حاجة بس مش كده.. نفسى الإنسان اللى ارتبط بيه ده يكون عارفنى وانا عارفاه.. اكون حابة انى اكمل حياتى معاه.. يكون داخل بيتى علشان هو بيحبنى جدا وعايزنى ابقى جنبه دايما.. مش داخل يشوف البضاعة؟"

ضحى: "بضاعة؟؟ بصى يا مونى.. اللى حصل حصل والمعاد إتاخد خلاص.. والفاس وقعت فى الراس يا جميل وبكرة هتقابلى اممممم.. هو صحيح اسمه ايه؟؟"

أمنية: "اااااااه فكرتينى يا ضحى فكرتينى.. عايزة تعرفى اسمه يا حبيبتى؟؟ مستعدة للصدمة؟؟ طيب خدى عندك.. اسمه اسماعيل ياسين.. ضحى .. ألو .. البنت ماتت ولا ايه؟؟"

ضحى: "هههههههههههه.. يا نهار ابيض.. طيب يا مونى دى بشرة خير, ده انتى كده هتقضى حياتك كلها كوميديا.. ههههههههههه"

أمنية: "ضحى وحياتك مش ناقصة هزار بقى".

ضحى: "طيب خلاص خلاص هسكت.. بس عايزة اقولك على حاجة قبل ما اقفل ضرورى .. انتى عارفة بكرة كام فى الشهر؟؟ 21/12/2012"

أمنية: "أهلا وسهلا يعنى اعمل ايه؟"

ضحى: "يا بنتى فى أوروبا والدول المتقدمة.. بيقولوا إن بكرة أخر يوم لينا كبنى أدمين على سطح الأرض, بكرة نهاية العاااااااااااااالم".

أمنية: "إيه ده؟؟ بجد الكلام ده؟ انا اول مرة اسمع عن الموضوع ده"

ضحى: "ده اللى انا سمعته فى كل حتة.. بس السؤال الحتمى بقى.. يا ترى العالم هينتهى قبل زيارة اسماعيل ولا بعدها.. ههههههههههه"

أمنية: " تصدقى إنك لو مقفلتيش دلوقتى هقفل السكة فى وشك وهمسح رقمك من عندى"

ضحى: "طيب خلاص خلاص متزعليش.. على العموم سلام دلوقتى ونتقابل بكرة بقى. يا فى الدنيا.. يا فى الاخرة".

أمنية: "مبقتش فارقة كتير.. أكيد فى الأخرة هلاقى عالم أحسن من اللى انا عايشة فيه دلوقتى ده".

قفلت مع صاحبتها ونسيت خالص موضوع العريس.. شغلها أكتر موضوع نهاية العالم ده.. دخلت على النت بسرعة ودورت فى الموضوع لاقت ناس كتير بيأيدوا النظرية.. وإفتكرت أغنية كانت سمعتها قريب اسمها  (سقوط السماء skyfall) وحست انها ماشية مع جو نهاية العالم.

مددت على سريرها وحطت السماعة فى ودنها وبدأت تدندن الأغنية:

إنها النهاية.. إحبس أنفسك وعد لعشرة

اشعر بالأرض تتحرك وأنظر لقلبى وهو يحترق

...

دع السماء تسقط حينما تتكسر

فلسوف نقف طويلا ونواجه كل ذلك معا

بعدها طفت نور الاوضة وراحت على سريرها.. وقبل ما تغمض عنيها قالت بصوت مسموع.. "تصبحى على خير.. يا دنيا".